Սերիալ >>> «Կարիճի համբույրը» - Փաուլոն և Միգելը

ՍԵՐԻԱԼ	Կարիճի համբույրը - Փաուլոն և Միգելը
	/ The Kiss of the Scorpion, Paulo and Miguel
	/ История Пауло и Мигеля
ՌԵԺԻՍՈՐ	Հյուգո դե Սուսա
ՍՑԵՆԱՐԻՍՏՆԵՐ	Անտոնիո Բառեիրա և Ժաո Մաթոս
ՏԱՐԵԹԻՎ	2014 (1 սեզոն)
ԵՐԿԻՐ	Պորտուգալիա
ԷՊԻԶՈԴՆԵՐԻ ԹԻՎԸ	34

Փաուլոն և Միգելը երկու երկրորդպլանի կերպարներ են «Կարիճի համբույրը» կոչված մի պորտուգալական հեռուստասերիալում, որը հեռարձակվել է 2014 թ.: Սերիալը բաղկացած է եղել 194 էպիզոդներից: 

Սերիալի հիմնական կերպարները երկու կանայք են, որոնք ապրում են Լիսաբոնում, և մի օր պարզվում է, որ քույրեր են: Այդ պահից սկսած նրանք մտնում են մշտական հակամարտության մեջ: Երկուսից մեկը՝ Ռիտան, բարի և մեծահոգի կին է, ով ցանկանում է քրոջը ներառել իր երջանիկ ընտանեկան կյանքում, սակայն, քույրը՝ Ալիսը, չար է և ցանկանում է ունենալ Ռիտայի կյանքը, նրա հարստությունը և նույնիսկ նրա ամուսնուն՝ Ֆերնանդոյին: 

Այստեղ ներկայացված հատվածները, սակայն, ուղղակիորեն չեն առնչվում այդ երկու հերոսների հետ և ներառում են միայն սերիալի այն դրվագները, որոնք վերոհիշյալ երկու տղամարդ կերպարների բարեկամության մասին են (վերակազմավորված 34 էպիզոդով):

ՍԵՐԻԱԼԻ ԹՐԵՅԼԵՐԸ  >>>

Երկու օդաչուներ, որոնք թռչում են չափազանց հեռու

Փաուլոն (Փեդրո Կարվալյո) և Միգելը (Դուարթե Գոմես) երկու օդաչուներ են, որոնք աշխատում են մի մասնավոր ավիաընկերության համար: Նրանք հաճախ թռչիքներ են իրականացնում միասին: Փաուլոն ծպտյալ նույնասեռական է և գաղտնի շփվում է մի ամուսնացած տղամարդու հետ: Սակայն նա ձևացնում է, որ սիրային հարաբերությունների մեջ է մի կնոջ հետ՝ թաքցնելով իր սեռական կողմնորոշումը բոլորից, բացառությամբ իր քրոջից՝ Թերեզայից և իր ընկեր Լեոից: Նրա գաղնապահության պատճառներից մեկը իր տնօրենն է, ով ատում է նույնասեռականերին և աշխատանքից ազատում է ցանկացած մեկին, ով բացահայտվում է որպես գեյ:

Փաուլոն իր սեռական կողմնորոշումը թաքցնում է նաև Միգելից, քանի որ Միգելը թունդ հոմոֆոբ է: Այնուամենայնիվ նրանք շատ մտերիմ ընկերներ են։ Միգելը մաչո և կնամոլ տղամարդ է, ով, որպես ապացույց իր առնականության, կապ է պահում միաժամանակ մի քանի կանանց հետ: Փաուլոյի և Միգելի բարեկամությունը և առհասարակ կյանքը ամբողջովին փոխվում են մի գիշեր, երբ նրանք խմում-հարբում են, որից հետո կատարվում է այն, ինչն անցում է սովորական բարեկամության սահմանները: Այդ գիշերվա դեպքերին հաջորդող լարվածությունը և հակամարտությունը տևում է շուրջ 12 էպիզոդ, մինչև հարցերը պարզվում են երկու հերոսների համար: Իսկ մնացած 22 էպիզոդներում ներկայացվում են մի շարք նոր և բարդ մարտահրավերներ, որոնց բախվում են նրանք:

Հետաքրքիր և զվարճալի

Հետաքրքրական է, որ սերիալի հեռարձակումից ի վեր Փաուլոյի և Միգելի պատմությունը այնքան է հայտնի դարձել, որ ստվերել է հիմնական սերիալը և նրա պատմությունը: Երկու դերասանները, ովքեր Պորտուգալական հեռուստաեթերի աստղեր են, շատ գեղեցիկ և գրավիչ տղամարդիկ են և իրենց դերերը գերազանց են կատարում: 

Ճիշտ է՝ որոշ էպիզոդներ զարգանում են չափազանց դանդաղ և, հետևաբար,  մի քիչ ձանձրալի են, բայց, ընդհանուր առմամբ, Փաուլոյի և Միգելի պատմությունը հետաքրքիր է և զվարճալի: Նրանց բարեկամությունը զարգանում է շատ անսպասելի և մասամբ անհավանական ձևով, բայց անհավանական իրադարձությունները տարածված ձևաչափ են «տելենովելա» կարգի ռոմանտիկ հեռուստասերիալներում:

IMDb ԳՆԱՀԱՏԱԿԱՆԸ	- / 10
ՄԵՐ ԳՆԱՀԱՏԱԿԱՆԸ	6 / 10

ՍԵՐԻԱԼԻ ԱՆԳԼԵՐԵՆ ԼՈՒՍԱԳՐԵՐՈՎ ՕՆԼԱՅՆ ՏԱՐԲԵՐԱԿԸ  >>>

ՍԵՐԻԱԼԻ ՌՈՒՍԵՐԵՆ ԼՈՒՍԱԳՐԵՐՈՎ ՕՆԼԱՅՆ ՏԱՐԲԵՐԱԿԸ  >>>

Սերիալ >>> «Բանան», մաս 1-ին՝ 2-ից

ՍԵՐԻԱԼ	Բանան / Banana / Банан
ՍՑԵՆԱՐԻՍՏ	Ռասել Թ Դեյվիս
ՏԱՐԵԹԻՎ	2015 (1 սեզոն)
ԵՐԿԻՐ	Միացյալ Թագավորություն
ԷՊԻԶՈԴՆԵՐԻ ԹԻՎԸ	8

Այս հեռուստասերիալը կարելի է «Վարունգ» սերիալի փոքր քույրը համարել: Սրա հեղինակը ևս Ռասել Թ Դեյվիսն է: Այն հեռարձակվել է «Վարունգ» սերիալին զուգահեռ և ներառել է նրա երիտասարդ կերպարներին, որոնք հիմնականում «Վարունգ»-ում ունեն երկրորդական նշանակություն (Ֆրեդին, Դինը, և այլն), ինչպես նաև ներկայացրել է մի քանի նոր կերպարներ:

Ի տարբերություն «Վարունգ» սերիալի, սակայն, «Բանան»-ը չունի շարունակական պատմություն. յուրաքանչյուր էպիզոդ ինքնաբավ  է (ունի ուրույն պատմություն):

ՍԵՐԻԱԼԻ ԹՐԵՅԼԵՐԸ  >>>

Արդի ԼԳԲՏ երիտասարդների անթալոգիա

«Բանան»-ը ժամանակակից ԼԳԲՏ երիտասարդների մասին է, ովքեր ապրում են Մանչեսթեր քաղաքում (Միացյալ Թագավորություն) և փնտրում են երջանկություն: Յուրաքանչյուր էպիզոդում տեսնում ենք մի լեսբուհի, գեյ կամ տրանսգենդեր կերպար, ով պատրաստվում է ինչ-որ ծանոթության և հանդիպման: Այս հանդիպումները լինում են կամ ռոմանտիկ (սովորաբար լեսբուհի կերպարների պարագայում) կամ սեքսային (գեյ կերպարների դեպքում): Ի դեպ, ցանկացած կերպարի սեռական կողմնորոշումը երբեք սյուժեի հիմնական հարցը չի դառնում. այն տրված իրողություն է՝ ի թիվս այլոց, և անհետանում է՝ փոխարինվելով ավելի կամ պակաս լուրջ թեմաներով:

Հարկ է նշել, որ այս սերիալի բոլոր կերպարները գրավիչ են և սքանչելի: Նրա 4-րդ էպիզոդում, բրիտանական հեռուստատեսության պատմության մեջ առաջին անգամ, մի տրանսգենդեր դերասան (Բեթանի Բլեքը) մարմնավորում է տրանսգենդեր կերպարի (Հելենին):

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՍԵՐԻԱԼԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>
KINOKRAD
KINOPROFI

___________________________________________________________

«Բանան» սերիալը այս կայքում 

ՍԵՐԻԱԼԻ ԹՐԵՅԼԵՐԸ + ՀՈԴՎԱԾԻ ՄԱՍ 1  >>>  ԱՅՍՏԵՂ

ԿԱԴՐԵՐ ՍԵՐԻԱԼԻՑ + ՀՈԴՎԱԾԻ ՄԱՍ 2  >>>  ԱՅՍՏԵՂ

Սերիալ >>> «Վարունգ», մաս 1-ին՝ 2-ից

ՍԵՐԻԱԼ	Վարունգ / Cucumber / Огурец
ՍՑԵՆԱՐԻՍՏ	Ռասել Թ Դեյվիս
ՏԱՐԵԹԻՎ	2015 (1 սեզոն)
ԵՐԿԻՐ	Միացյալ Թագավորություն
ԷՊԻԶՈԴՆԵՐԻ ԹԻՎԸ	8

Այս հեռուստասերիալը ցույց է տալիս Հենրիի (Վինսենթ Ֆրանկքին) և Լենսի (Սիրիլ Նրի) հանկարծակի բաժանումը շատ և հավանաբար՝ չափից ավելի հանգիստ ու խաղաղ 9 տարիների համատեղ կյանքից հետո: Հենրին, ով 46-ամյա ապահովագրական ընկերության մենեջեր է և Լենսը, ով աշխատում է հսկայական մի ակվարիումում, ապրում են Մանչեսթերում (Միացյալ Թագավորություն): Այս միջին խավի զույգը, փաստորեն, կանգնած է իր հեռանկարների բարդ խնդրի, ինչպես նաև սեռական բավարարվածության կամ ավելի ճիշտ՝ անբավարարվածության հարցի առջև: Ի տարբերություն գեյ թեմաներով զբաղվող շատ այլ սերիալների, որոնք կենտրոնացել են երիտասարդ նույնասեռականների ինքնաբացահայտման և ինքնաարտահայտման հարցերի վրա, այս սերիալը հիմնականում զբաղվում է միջահասակ նույնասեռականների խնդիրներով, ովքեր արդեն անցել են կյանքի այդ փուլերը:

Առաջին էպիզոդում Լենսի ամուսնության առաջարկը Հենրին մերժում է, որից  հետո բացահայտվում է, որ Հենրին երբևէ չի զբաղվել անալ սեքսով, որը Լենսի համար մեծ վրդովմունքի աղբյուր է: Ի պատասխան՝ Հենրին Լենսին քննադատում է, որ նա երբեք լողալ չի սովորել, և այս վեճը թեժանում է ու մեծ զայրույթի հասցնում կողմերին: Իհարկե, խնդիրը ո՛չ Հենրիի անալ սեքսի հանդեպ ունեցած վախն ու բարդույթն է, ո՛չ էլ Լենսի չլողալը, այլ, ըստ էության, այն, որ Հենրին գտնվում է միջին տարիքի խորը ճգնաժամի փուլում, որը ուղակիորեն արտացոլվում է նրա բոլոր անձնական և աշխատանքային հարաբերություններում: Լենսի հետ ամուսնության հարցը տեղավորվում է այս համատեքստում:

Լենսից բաժանվելով՝ Հենրիի հին կյանքը լիովին փլուզվում է և նա սկսում է մի նոր կյանք՝ անծանոթ կանոններով: Շատ արագ նա իրեն գտնում է իր աշխատավայրում աշխատող մի շարք երիտասարդ գեյերի և լեսբուհիների շարքերում: Դրանք ներառում են հմայիչ, բայց չկայացած Դինին (Ֆիսայո Աքինադե) և հրապուրիչ ու մանիպուլյատիվ Ֆրեդիին (Ֆրեդի Ֆոքս), որոնք ապրում են մի հսկայական բնակարանում: Փորձելով համակերպվել իր երիտասարդ սենյակակիցների հետ՝ Հենրին ստիպված է լինում առերեսվել իր՝ չլուծված որոշ անձնական հարցերին:

ՍԵՐԻԱԼԻ ԹՐԵՅԼԵՐԸ  >>>

Հարուստ թե՛ թեմաներով և թե՛ ձևաչափով

Այս սերիալը պարունակում է որոշ ողբերգական դրվագներ, սակայն ընդհանուր առմամբ կարելի է նրան համարել որպես կատակերգություն: Բազմաթիվ տեսարաններ և երկխոսություններ անչափ ծիծաղաշարժ են: Պատմությունը թեև երբեմն զարգանում է խառը և անհամահունչ ձևով, այն ընդհանուր առմամբ հետաքրքրաշարժ է, անկանխատեսելի և զվարճալի: Որպես սերիալի կենտրոնական կերպար՝ Հենրին, բնականաբար, ծիծաղելի ու սրամիտ պահերի մեծ մասի ձեռնարկողն է: Սակայն, ինչպես որոշ այլ կերպարներ, նա ևս երբեմն ունի տհաճ դրսևորումներ:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՍԵՐԻԱԼԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>
KINOKRAD
UAKINO
KINOPROFI

___________________________________________________________

«Վարունգ» սերիալը այս կայքում 

ՍԵՐԻԱԼԻ ԹՐԵՅԼԵՐԸ + ՀՈԴՎԱԾԻ ՄԱՍ 1  >>>  ԱՅՍՏԵՂ

ԿԱԴՐԵՐ ՍԵՐԻԱԼԻՑ + ՀՈԴՎԱԾԻ ՄԱՍ 2  >>>  ԱՅՍՏԵՂ

ՋԻՖ ԱՆԻՄԱՑԻԱ, Հենրին և Ֆրեդին  >>>  ԱՅՍՏԵՂ

Սերիալ >>> «Խնդրում եմ՝ սիրեք ինձ», մաս 1-ին՝ 2-ից

ՍԵՐԻԱԼ	Խնդրում եմ՝ սիրեք ինձ / Please Like Me
	/ Полюби меня
ՌԵԺԻՍՈՐ	Մեթյու Սավիլ
ՏԱՐԵԹԻՎ	2013 – 2016 (4 սեզոն)
ԵՐԿԻՐ	Ավստրալիա
ԷՊԻԶՈԴՆԵՐԻ ԹԻՎԸ	32 (6 + 10 + 10 + 6)

Այս սերիալը 21-ամյա Ջոշի (Ջոշ Թոմաս), նրա ընտանիքի և ընկերների կյանքի մասին է: Նրանք բնակվում են ավստրալիական մի քաղաքի միջին խավի բնակչությամբ արվարձաններից մեկում: Ջոշի ծնողները վերջերս անցել են ամուսնալուծության դառը ճանապարհով, որից հետո նրա մայրը հայտնվել է խորը դեպրեսիայի մեջ, իսկ հայրը մտադիր է ամուսնանալ իր երիտասարդ թայլանդացի ընկերուհու հետ: Ջոշը ուսանող է, բայց մենք իրականում նրան երբեք ուսումնական միջավայրում կամ տանը պարապելիս չենք տեսնում: 

Ջոշը ապրում է երկու կամ երբեմն երեք սենյակակիցների հետ, մի փոքր տան մեջ, որը պատկանում է իր հորը: Սենյակակիցներից մեկը Թոմն (Թոմաս Վարդ) է, ով Ջոշի ամենամոտ ընկերն է: Թոմը շատ լայնախոհ երիտասարդ մասնագետ է, ով աշխատում է ՏՏ ոլորտում: Նա գրեթե սեքսամոլ է և ժամանակ առ ժամանակ ընկերուհիներ է փոխում:

ՍԵՐԻԱԼԻ ԹՐԵՅԼԵՐԸ  >>>

Առաջին էպիզոդում Ջոշը կատարում է կարևոր մի ինքնաբացահայտում՝ նրա զուգընկերուհին՝ Կլերը (Կեյթլին Սթեյսի), նրան հայտնում է, որ նրանք պետք է դադարեցնեն իրենց հարաբերությունները. Կլերը կարծում է, որ Ջոշը, ամենայն հավանականությամբ, նույնասեռական է: Հետաքրքիր է, որ այս հայտնությանը չեն հետևում ինչ-որ դրամատիկ իրադարձություններ: Այն փաստը, որ Ավստրալիայում նույնասեռականությունը լայնորեն ընդունված է, նշանակում է, որ Ջոշի սեռական կողմնորոշման մասին նոր իրողությունը համարվում է անխնդրահարույց թե՜ նրա համար, թե՜ իր ընտանիքի և իր ընկերների համար և թե՜ նույնիսկ Կլերի համար: Ոչ ոք չի ցնցվում, ոչ ոք չի պոռտքում, ոչ ոք չի անհանգստանում և ոչ ոք նույնիսկ չի նրան խղճում: Միակը, ով անակնկալի է գալիս, Ջոշի տարեց մորաքույրն է, ով, չնայած իր խորը կրոնական համոզմունքների, ի վերջո ընդունում է նոր իրողությունը:

Բարդ կատակերգություն

Այս կիսա-ինքնակենսագրական աշխատանքը շատ ինքնատիպ և զվարճալի հեռուստասերիալ է, որը ներառում է առատ խելամիտ հումոր, նույնիսկ այն ժամանակ, երբ ցուցադրում է կյանքի դառը և տհաճ իրողությունները, ինչպիսիք են մահը, ինքնասպանությունը, ռասիզմի և հոմոֆոբիայի դրսևորումները, հոգեկան խանգարումը և ներվային ճգնաժամը: 

Սովորաբար յուրաքանչյուր էպիզոդ ունի ուրույն պատմություն, որը զարգանում է անկանխատեսելի ձևով: Բացման կադրերը ցուցադրում են կերակրի պատրաստման դրվակներ, որոնցում Ջոշը եփում է ինչ-որ ճաշատեսակ կամ աղանդեր: Յուրաքանչյուր էպիզոդ կրում է մի ուտեստի անուն:

ՍԵՐԻԱԼԻ ԲԱՑՄԱՆ ԵՐԳԸ  >>>

Սերիալի ցենարը հիմնականում գրել է Ջոշ Թոմասը, ով նաև մարմնավորում է հիմնական կերպարին: Նա մշակել է Ջոշի կերպարը՝ հիմնվելով իր անհատականության և իր անձնական կյանքի մի շարք դրվագների վրա: Ջոշը ո՛չ գեղեցիկ է, ո՛չ էլ սեքսուալ (ըստ նրա՝ նա նման է «մի 50-ամյա ծեր երեխայի»), նա տարօրինակ է, շատախոս և ծիծաղելի: Հետաքրքրական է, որ նրա լավագույն ընկեր Թոմի կերպարը ևս խաղում է իրական անձ՝ Թոմաս Վարդը: Չնայած նրան, որ Թոմը գեյ չէ, նա Ջոշի հետ շարունակում է իր անկեղծ և խորը բարեկամությունը, որը պատմության հետաքրքիր կողմերից մեկն է:

Պետք է խոստովանել, որ ոչ միայն Ջոշը և Թոմը, որոնք խաղում են իրենց կերպարները, այլև բոլոր մյուս դերասանները հրաշալի են խաղում: Սերիալի ռեժիսորությունը ևս գերազանց է, որը սցենարի և դերասանների խաղի հետ միասին այս սերիալը դարձնում են չափազանց բնօրինակ և հետաքրքրական մի ստեղծագործություն:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՍԵՐԻԱԼԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>
ZSERIALS (4 սեզոն)
ZFILM (3 սեզոն)
UAKINO (3 սեզոն)

___________________________________________________________

«Խնդրում եմ՝ սիրեք ինձ» սերիալը այս կայքում 

ՍԵՐԻԱԼԻ ԹՐԵՅԼԵՐԸ + ՀՈԴՎԱԾԻ ՄԱՍ 1  >>>  ԱՅՍՏԵՂ

ԿԱԴՐԵՐ ՍԵՐԻԱԼԻՑ + ՀՈԴՎԱԾԻ ՄԱՍ 2  >>>  ԱՅՍՏԵՂ

ՋԻՖ ԱՆԻՄԱՑԻԱ 1, Ջոշի սրամտությունները  >>>  ԱՅՍՏԵՂ

ՋԻՖ ԱՆԻՄԱՑԻԱ 2, Ջոշը և Արնոլդը  >>>  ԱՅՍՏԵՂ

Սերիալ >>> «Մարդկանց պես տարօրինակ», մաս 1-ին՝ 3-ից

ՍԵՐԻԱԼ	Մարդկանց պես տարօրինակ / Queer as Folk
	/ Близкие друзья
	հիմնված համանուն Բրիտանական սերիալի վրա
ՏԱՐԵԹԻՎ	2000 – 2005 (5 սեզոն)
ԵՐԿԻՐ	ԱՄՆ
ԷՊԻԶՈԴՆԵՐԻ ԹԻՎԸ	83 (22+20+14+14+13)

Այս հեռուստասերիալը ունի կարևորագույն պատմական նշանակություն, քանի որ եղել է առաջին դրամատիկ կատակերգրական սերիալը, որը կենտրոնացել է նույնասեռական կերպարների և նրանց կյանքերի վրա: Մինչ այդ մի քանի ամերիկյան ու եվրոպական սերիալներ 1980-1990-ականներին, ընդգրկել էին նույնասեռ-երկսեռական կերպարների, բայց միշտ հիմնական հերոսների և նրանց պատմությունների եզրում՝ առանց ամբողջությամբ անդրադառնալու նրանց ինքնությանը, այդ թվում` նրանց սեռական կյանքին:

Այս սերիալի Բրիտանական և բնօրինակ տարբերակը, որը եղել է Ուելսացի պրոդյուսեր և սցենարիստ Րասել Թ. Դեյվիսի մտահղացումը, հեռարձակվել է երկու սեզոններով՝ 1998-ին և 1999-ին (8 էպիզոդ առաջին սեզոնում և միայն 2 էպիզոդ երկրորդ սեզոնում): Սերիալը թե՛ Միացյալ թագավորությունում և թե՛ Եվրոպական այլ երկրներում այնքան մեծ հաջողության է արժանացել, որ «Շոութայմ» ամերիկյան կաբելային հեռուստաալիքը նախաձեռնել է սերիալի ամերիկա-կանադական տարբերակը, որը, իր հերթին, է՛լ ավելի մեծ հաջողության է հասել: Փաստորեն, ամերիկա-կանադական տարբերակը հեռարձակվել է ավել երկար ժամանակ (2000-ից մինչև 2005 թ.)՝ ներառելով 5 սեզոն՝  83 էպիզոդով:

ՍԵՐԻԱԼԻ ԹՐԵՅԼԵՐԸ  >>>

Հարկ է նշել, որ չնայած նրան, որ ամերիկա-կանադական տարբերակի պատմությունը տեղի է ունենում ԱՄՆ-ի Փենսիլվանիա նահանգի Փիթսբուրգ քաղաքում, սերիալն իրականում նկարահանվել է Կանադայի Թորոնթո քաղաքում և սերիալի վրա աշխատել են  մի շարք կանադացի ռեժիսորներ,  որոնք ճանաչված են եղել իրենց ինքնուրույն կինոստեղծագործությունների համար: Նաև նշենք, որ սերիալում ցուցադրած վայրերի մեծ մասը կեղծ են։  Օրինակ՝ Ազատության փողոցը և նրա հարակից թաղամասը կամ Բաբելոն դիսկոտեկը իրականում գոյություն չունեն: Սակայն, այդ վայրերին նման վայրեր կան Թորոնթոյում:

ԿԱԴՐԵՐ ՍԵՐԻԱԼԻՑ  >>>  Բաբելոնը այնպես, ինչպես պատկերված է սերիալում ցույց է տալիս պարասրահի կարևորությունն որպես սոցիալականացման և հանդիպումների վայր

Պատմությունը

Սերիալը սկսվում է 17-ամյա Ջասթինի (Րենդի Հերիսոն)՝ Ազատության փողոց (գեյ թաղամաս) ժամանելով, որտեղ նա մտադիր է ուսումնասիրել իր սեռական կողմնորոշումը: Այդտեղ նրա կյանքը խաչվում է չորս այլ նույնասեռական տղամարդկանց և մեկ լեսբուհի զույգի կյանքերի հետ: Մասնավորապես՝ նա նախ հանդիպում է Բրայանին (Գեյլ Հերոլդ), Մայքլին (Հալ Սփարքս), Էմեթին (Փիթր Փեյջ) և Թեդին (Սկոթ Լովել): Մի քանի կադրեր անց, ծննդատանը նա ծանոթանում է Լինդսիի (Թեա Գիլ) և Մելանիի (Միշել Կլյունի) հետ: Ավելի ուշ սերիալը ներկայացնում է ևս երկու հիմնական կերպարներ՝ Մայքլի մայր Դեբիին (Շերոն Գլես) և Մայքլի հորեղբայր Վիկին (Ջեք Վեթերալ): Շատ քիչ հիմնական կերպարներ են ներգրավվում հաջորդ էպիզոդներում և սեզոններում:

Սերլիալն իր տարբեր էպիզոդների ընթացքում ցուցադրում և քննարկում է մի շարք հիմնախնդիրներ և հարցեր, որոնց նույնասեռականները բախվել են Արևմուտքում՝ հատկապես 20-րդ դարի վերջից ի վեր (հետ-ազատագրական շարժման շրջանում): Օրինակ՝

• Հարաբերությունների կարգավորման հարցն այն ծնողների հետ, ովքեր շարունակում են չնդունել զավակի սեռական կողմնորոշումը (Ջասթին, Բրայան և Լինդսի)
• Դեռահաս պատանու սեռական ինքնության դրսևորման հարցն իր ընտանիքի անդամների և ընկերների շրջանակում (Ջասթին)
• Կեղծե՞լ, թե՞ բացահայտել սեռական ինքնությունը աշխատատեղում  երկընտրանքը (Մայքլ)
• Ընտանիք ձևավորելու խնդիրը (կազմել կայուն զույգ և դաստիարակել երեխաներ)՝ նույնիսկ անբարենպաստ հասարակական միջավայրի պարագայում (Լինդսի և Մելանի)
• Վախ՝ պարտավորվելու զուկընկերոջ հետ կայուն հարաբերություններ կառուցել (գրեթե բոլոր հիմնական կերպարները)
• Հոմոֆոբ բռնությունները և դրանց դիմադրելու հրամայականը (Ջասթին)
• Մարմնավաճառությունը և ինտերնետային պոռնոգրաֆիան (Էմեթ և Թեդ)
• ՁԻԱՀ-ով (Մայքլի հորեղբայրը) և սեռական ճանապարհով փոխանցվող այլ հիվանդություններով վարակվելու ռիսկերը (մի քանի կերպարներ)։

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  > > >  ԱՅՍՏԵՂ

ՍԵՐԻԱԼԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>
ZFILM
MEGASERIAL
ONLINE-LIFE
SERIA-Z

___________________________________________________________

«Մարդկանց պես տարօրինակ» սերիալը այս կայքում 

ՍԵՐԻԱԼԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ

ՀՈԴՎԱԾԻ ՄԱՍ 2 >>> ԱՅՍՏԵՂ

ՀՈԴՎԱԾԻ ՄԱՍ 3 >>> ԱՅՍՏԵՂ

ՖԱՆԱՏԻ ՎԻԴԵՈ ՄՈՆՏԱԺ 1 >>> ԱՅՍՏԵՂ

ՖԱՆԱՏԻ ՎԻԴԵՈ ՄՈՆՏԱԺ 2 >>> ԱՅՍՏԵՂ

ՖԱՆԱՏԻ ՎԻԴԵՈ ՄՈՆՏԱԺ 3 >>> ԱՅՍՏԵՂ

ՋԻՖ ԱՆԻՄԱՑԻԱ 1, Բրայան կոչված երևույթը >>> ԱՅՍՏԵՂ

ՋԻՖ ԱՆԻՄԱՑԻԱ 2, Բրայանի և Ջասթինի սերը >>> ԱՅՍՏԵՂ

ՋԻՖ ԱՆԻՄԱՑԻԱ 3, սերիալի հերոսները >>> ԱՅՍՏԵՂ

ՖԻԼՄ >>> «Տղաները», մաս 1-ին՝ 2-ից

ՖԻԼՄ	Տղաները / Boys / мальчики
ՌԵԺԻՍՈՐ	Միշա Քամփ
ՍՑԵՆԱՐԻՍՏՆԵՐ	Քրիս Ուեսթենդորփ, Յափ-Փիթեր Էնդերել
ԵՐԱԺՇՏՈՒԹՅՈՒՆ	Րութխեր Րեյնդերս
ԳԼԽ. ԴԵՐԱՍԱՆՆԵՐ	Խեյս Բլոմ, Քո Զանդֆլիեթ
ՏԱՐԵԹԻՎ	2014
ԵՐԿԻՐ	Նիդերլանդներ
ՏԵՎՈՂՈՒԹՅՈՒՆ	76

ՖԻԼՄԻ ԹՐԵՅԼԵՐԸ  >>>

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՖԻԼՄԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>

____________________________________________________________

«Տղաները» ֆիլմը այս կայքում 

ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ

ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ

ՖԻԼՄԻ ՍԱՈՒՆԴԹՐԵՔԸ >>> ԱՅՍՏԵՂ

ՖԱՆԱՏԻ ՎԻԴԵՈ ՄՈՆՏԱԺ 1 >>> ԱՅՍՏԵՂ

ՖԱՆԱՏԻ ՎԻԴԵՈ ՄՈՆՏԱԺ 2 >>> ԱՅՍՏԵՂ

ՋԻՖ ԱՆԻՄԱՑԻԱ 1 >>> ԱՅՍՏԵՂ

ՋԻՖ ԱՆԻՄԱՑԻԱ 2 >>> ԱՅՍՏԵՂ

ՖԻԼՄ >>> Հպարտություն, մաս 1-ին՝ 2-ից

ՖԻԼՄ	Հպարտություն / Pride / Гордость
ՌԵԺԻՍՈՐ	Մաթյու Ուարչս
ՍՑԵՆԱՐԻՍՏ	Սթեֆեն Բերեսֆորդ
ԵՐԱԺՇՏՈՒԹՅՈՒՆ	Քրիստոֆեր Նայթինգեյլ
ԳԼԽ. ԴԵՐԱՍԱՆՆԵՐ	Բեն Շնեթզեր, Բիլ Նիգի, Իմելդա Սթանթոն,
	Դոմինկ Ուեսթ
ՏԱՐԵԹԻՎ	2014
ԵՐԿԻՐ	Միացյալ Թագավորություն
ՏԵՎՈՂՈՒԹՅՈՒՆ	120

Հիմնված իրական մի պատմության վրա, որը արդեն ներշնչել է «Պարել Դուլայիսում» կարճ վավերագրական ֆիլմը (1985 թ.)` այս ֆիլմը ցույց է տալիս, թե ինչպես մի խումբ նույնասեռական ակտիվիստներ փորձում են ֆինանսապես աջակցել բրիտանացի հանքագործներին և նրանց ընտանիքներին, 1984-ի գործադուլի ընթացքում: Այդ ժամանակ, պահպանողական վարչապետ Մարգարետ Թեթչերը փորձում էր ամեն գնով թուլացնել արհմիություններին և կտրականապես մերժում էր բանակցել գործադուլ անող հանքագործների հետ:

Նույնասեռականների ազատագրական շարժման մասին արդեն իսկ էկրան են բարձրացել մի շարք ֆիլմեր: Բայց այս ֆիլմը գալիս է լրացնելու մի բաց. առաջին անգամ սինեմատոգրաֆում անդրադարձ է կատարվում նույնասեռականների շարժման և հասարակական այլ շարժումների միջև զգայուն և բարդ փոխհարաբերություններին ու փորձ արվում ուսումնասիրել դրանք: 

Պատմականորեն, աջ-պահպանողական ուժերը դեմ են եղել նույնասեռականների հավասար իրավունքներին և ճնշել այն խմբերին, որոնք հանդես են եկել ի նպաստ այդ իրավունքների ճանաչմանը: Մյուս կողմից էլ, ձախակողմյան ուժերը ևս չեն ցուցաբերել մեծ բարյացակամություն նույնասեռական խմբերի հանդեպ: Ձախ թեքման շատ ուժեր ընդհանրապես բացառել են սեռականության հետ կապված հարցերը քաղաքական հարթակից և մասնավորապես նույնասեռականությունը համարել են որպես մի տեսակ «բուրժուական անկում» և «հասարակական շեղում»: 

Այս մոտեցումներն Արևմուտքում սկսել են փոխվել 1960-ականների մշակութային շարժումներից ի վեր, երբ ի հայտ են եկել որակապես նոր տեսակի հասարակական և քաղաքական ուժեր, այդ թվում՝ ֆեմինիստական շարժումը, քաղաքացիական իրավունքների շարժումը և բնապահպանները:

«Ճնշվածները» միասին

Ֆիլմի պատմությունը սկսվում է այն պահից, երբ Մարք Էշթոնը (Բեն Շնեթզեր), ով մի եռանդուն և ազդեցիկ ակտիվիստ է, 1984 թ. Լոնդոնի գեյ-հպարտության երթի ժամանակ համախմբում է իր ընկերներին, որպիսզի միասին գումար հավաքեն ի նպաստ հանքագործների: 

Ըստ Էշթոնի, թե՛ նույնասեռականները և թե՛ հանքագործները ենթակա են պետության կողմից ճնշումների, ոստիկանության կողմից հալածանքների, և իշխող պահպանողական կուսակցության և դեղին մամուլի կողմից ատելության: Ուստի նրանք պիտի զորակցեն միմյանց: Էշթոնը և նրա ընկերները ստեղծում են «Լեսբուհիներն և գեյերն աջակցում են հանքագործներին» կամ LGSM (ըստ անգլերենի հապավումը) կազմակերպությունը: Սակայն, երբ նրանք հավաքում են որոշակի գումար, Հանքագործների ազգային արհմիությունը «անհարմար» է տեսնում նրանց գումարը ընդունել, վախենալով որ նույնասեռականների հետ առնչվելը կարող է «վնասել» իրենց իմիջին:

ՖԻԼՄԻ ԹՐԵՅԼԵՐԸ  >>>

Քիչ հավանական հանդիպում երկու խմբերի միջև

LGSM ակտիվիստները չեն հետ նստում, այլ որոշում են անտեսել արհմիության ղեկավարության և ուղղակի կապ հաստատել գործադուլ անող հանքագործների հետ: Նրանք ի վերջո գտնում են մի հանքարդյունաբերության համայնք Ուելսի հեռավոր մի գյուղաքաղաքում՝ Օնլուին անունով, որը պատրաստ է ընդունել լեսբուհիների և գեյերի նվիրատվությունը: Ակտիվիստները մեկնում են Օնլուին՝ իրենց վառ դեղին գույնի ֆուրգոնի մեջ:

Երկու շատ հակապատկեր խմբերի հանդիպումը ստեղծում է բազմաթիվ հետաքրքիր և ծիծաղելի պահեր: Սկզբում, սակայն, երկու կողմերը կասկածանքով են վերաբերվում միմյանց: Փաստորեն, իրենց «տարօրինակ» հյուրերին ընդունելու գործում հանքագործների կանայք ցուցաբերում են առավել ճկունություն և ջերմություն քան թե իրենց ամուսինները: 

Հետաքրքիր է, որ պատմության շրջադարձային պահը տեղի է ունենում մի խնջույքի ժամանակ: Մաչո հանքագործներն իրենց «չափազանց տղամարդ» համարելով՝ սովորաբար չեն պարում իրենց կանանց հետ և հետևաբար կանայք ոգևորվում են, երբ LGSM ակտիվիստներից մեկը՝ Ջոնաթանը (Դոմինկ Ուեսթ) նրանց բոլորին պարի է հրավիրում` կատարելով գժային մի պար՝ Շիրլի Էնդ Կոմփանիի 70-ականների հիթ՝ «Ամոթ, ամոթ, ամոթ» երգի ներքո:

Հանքագործների շարքերում կան, իհարկե, մի քանի անհատներ, ովքեր ի սկզբանէ խանդավառությամբ են ողջունում գեյ ակտիվիստներին և կողմ են նրանց հետ համագործակցության, այդ թվում՝ Հեֆինան (Իմելդա Սթանթոն), ով անխռով մի կազմակերպիչ է, և Կլիֆը (Բիլ Նիգի), ով տեղական արհմիության շատ քաղաքավարի և ամաչկոտ քարտուղարն է:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՖԻԼՄԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>

___________________________________________________________

«Հպարտություն» ֆիլմը այս կայքում 

ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ

ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ

ՋԻՖ ԱՆԻՄԱՑԻԱ 1 >>> ԱՅՍՏԵՂ

ՋԻՖ ԱՆԻՄԱՑԻԱ 2 >>> ԱՅՍՏԵՂ

ՖԻԼՄ >>> ՊՂՊՋԱԿԸ, մաս 1-ին՝ 2-ից

ՖԻԼՄ	Պղպջակը / The Bubble / Пузырь
ՌԵԺԻՍՈՐ	Եյթան Ֆոքս
ՍՑԵՆԱՐԻՍՏՆԵՐ	Եյթան Ֆոքս, Գալ ՈՒչովսկի
ԵՐԱԺՇՏՈՒԹՅՈՒՆ	Իվրի Լիդեր
ԳԼԽ. ԴԵՐԱՍԱՆՆԵՐ	Օհադ Քնոլեր, Յուսեֆ Սուեյդ
ՏԱՐԵԹԻՎ	2006
ԵՐԿԻՐ	Իսրայել
ՏԵՎՈՂՈՒԹՅՈՒՆ	117

«Մարդիկ գուցե տեսնեն, թե մենք միասին որքան գեղեցիկ ենք և հասկանան, թե այս պատերազմները ինչքան հիմարություն են: Ոչ ... նրանք հավանաբար երբեք նման բան չեն մտածի»:

Երեք Իսրայելցի երիտասարդներ

Երեք Իսրայելցի երիտասարդներ` մեկ կին եւ երկու գեյ տղամարդ, բնակվում են միասին Թել Ավիվ քաղաքում: Լուլուն մի գրավիչ աղջիկ է, ով աշխատում է որպես վաճառորդուհի օճառի խանութում: Նոամը (Օհադ Քնոլեր) աշխատում է երաժշտական մի խանութում և բանակի պահեստազորային է և հանգստյան օրերին ծառայում է որպես անցակետի պահակ: Երրորդը` Յալին, ռեստորանի կառավարիչ է:

Երեքն էլ հիմնականում ընկած են իրենց հաճույքների հետևից և կենտրոնացած են իրենց սիրային կյանքի վրա՝ հուսալով գտնել իրենց «կյանքի տղամարդուն»: Ինչ վերաբերում է նրանց քաղաքական կողմնորոշմանը, նրանք ձախակողմյաններ են և կողմնակից պաղեստինցիների հետ խաղաղության գաղափարին: Նրանց քաղաքական գործունեությունը, սակայն, մակերեսային է: Օրինակ` Պաղեստինի բռնագրավման հարցում իրենց անհամաձայնությունը արտահայտելու համար, նրանք կազմակերպում են ռեյվ տոնախմբություն ծովափում!

Թել Ավիվը որպես պղպջակ

Թել Ավիվը և, մասնավորապես, դրա ժամանակակից թաղամասերից մեկը` Շեյքինը, փոքր-ինչ առանձնացած է երկրի մնացած մասերից: Այս հանդուրժողականության «պղպջակը» իր մեջ է համախմբում արվեստագետների, ազատամիտների, նույնասեռականներ և երիտասարդների, որոնք իրենց մեկուսացրել են շրջակա հակամարտություններից:

Սակայն ֆիլմի երեք հերոսների խաղաղության և զվարթության «պղպջակը» պայթում է այն պահին, երբ մի գեղեցիկ պաղեստինցի` Աշրաֆը (Յուսեֆ Սուեյդ) մուտք է գործում նրանց բնակարան և հետո նաև նրանց կյանք:

ՖԻԼՄԻ ԹՐԵՅԼԵՐԸ  >>> 

Աշրաֆը

Նոամը և Աշրաֆը առաջին անգամ հանդիպում են մի տխուր ու լարված միջադեպի ընթացքում, որը տեղի է ունենում Նաբլուսի անցակետերեից մեկում՝, Իսրայելի կողմից օկուպացված տարածքներում: Աշրաֆի Թել Ավիվ գալուց հետո Նոամը, Լուլուն և Յալին անում են ամեն ինչ, որպեսզի օգնեն Աշրաֆին արագորեն տեղավորվի քաղաքում և փորձում են նրան ներգրավել իրենց «պղպջակի » մեջ:

Աշրաֆը ըստ երևույթի սիրում և վայելում է նույնասեռական անձի ազատ և անկաշկանդ ապրելակերպը Թել Ավիվում: Նրա ներկայությունը, սակայն, մյուսներին պարտադրաբար դնում է երկրում տիրող պառակտման իրողության առջև, ու արդեն անմիջականորեն և ոչ թե հեռուստատեսային հաղորդումների միջոցով:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ
  

Ռուսերեն ենթագրերով օնլայն տարբերակ  >>> 

___________________________________________________________
«Պղպջակը» այս կայքում

 ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ
ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ
ՖԻԼՄԻ ՍԱՈՒՆԴԹՐԵՔԸ >>> ԱՅՍՏԵՂ
ՖԱՆԱՏԻ ՎԻԴԵՈ ՄՈՆՏԱԺ 1 >>> ԱՅՍՏԵՂ
ՖԱՆԱՏԻ ՎԻԴԵՈ ՄՈՆՏԱԺ 2 >>> ԱՅՍՏԵՂ

Ֆիլմ >>> Ելակ և Շոկոլադ, մաս 1-ին՝ 2-ից

ՖԻԼՄ	Ելակ և Շոկոլադ / Strawberry and Chocolate
	/ Клубника и шоколад
ՌԵԺԻՍՈՐՆԵՐ	Թոմաս Գութիերեզ Ալեա, Խուան Կարլոս Թաբիո
ՍՑԵՆԱՐԻՍՏ	Սենել Փազ
	Հիմնված Ս. Փազի «Գայլը, անտառը և նոր մարդը» պատմվածքի վրա
ԵՐԱԺՇՏՈՒԹՅՈՒՆ	Խոզե Մարիա Վիթիեր
ԳԼԽ.ԴԵՐԱՍԱՆՆԵՐ	Խորխե Փերուգորիա , Վլադիմիր Կրուզ
ՏԱՐԵԹԻՎ	1994
ԵՐԿԻՐ	Կուբա, Մեքսիկա
ՏԵՎՈՂՈՒԹՅՈՒՆ	108

Այս ֆիլմը պատմում է երկու տարբեր և շատ առումներով հակադիր կերպարների հանդիպման մասին Հավանայում (Կուբա), 1979 թ.: Մի օր, սրճարանում տեղ չլինելու պատճառով, Դիեգոն (Խորխե Փերուգորիա) և Դավիդը (Վլադիմիր Կրուզ) նստում են նույն սեղանին: Դավիդը համոզված է, որ Դիեգոն նույնասեռական է, քանի որ նա ուտում է ելակե պաղպաղակ, թեև դա հազվադեպ օրերից է, երբ Հավանայում առկա է շոկոլադե պաղպաղակ, և, բնականաբար, բոլոր սովորական մարդիկ էլ ուտում են այն:

Ելակը 

Եվ նա չի սխալվում: Դիեգոն գեյ է, արվեստագետ և չափազանց դժգոհ է երկրում քաղաքական և գեղարվեստական ազատությունների բացակայությունից: Նա շատ կիրթ, նրբաճաշակ, կոլորիտային և աշխույժ մարդ է, ունի ուժեղ արտահայտված նուրբ վարքուբարք, և իր բնակարանը զարդարել է փոքր-ինչ Փարաջանովի տուն-թանգարանի ոճով, իրար կողքի շարելով՝ գույնզգույն կոլաժներ, զարմանալի իրեր, քանդակներ, լուսանկարներ և գեղանկարներ:

Շոկոլադը

Դավիդը տարասեռական տղա է՝ համալսարանի ուսանող, նեղմիտ ու ազգայնական,  կոմունիստական կուսակցության ռազմիկ: Նա գյուղական համեստ ընտանիքի զավակ է և հիմա ապրում է հանրակացարանի խիստ պայմաններում: Նրա անձնական կյանքը վերջերս փլուզվել է. նրա նշանածը նրան լքել է՝ ամուսնանալու մեկ այլ տղամարդու հետ, ով կարող է պարգևել ապահով ու հարմարավետ կյանք: Դավիդը ազնիվ մարդ է և որոշ առումներով՝ միամիտ ու լի նախապաշարումներով ու կարծրատիպային գաղափարական մտածողությամբ: Նա կարծում է, որ նույնասեռականությունը հիվանդության տեսակ է, որի առաջացման պատճառը վահանագեղձում է գտնվում:

ՖԻԼՄԻ ԹՐԵՅԼԵՐԸ  >>>

Ելակը և Շոկոլադը

Սրճարանից հետո, նրանք գնում են Դիեգոյի բնակարան, բայց կարճ ժամանակ անց, երբ Դավիդը զգում է, որ Դիեգոն սեռական մտադրություններ ունի, լքում է Դիեգոյին: Նա չի ցանկանում կրկին հանդիպել Դիեգոյին։ Բայց, երբ իր համակուսակից ընկերոջը պատմում է, որ հանդիպել է «տարօրինակ» մի տղայի, ով ունի արգելված իրեր, ինչպես օրինակ ամերիկյան ձայնասկավառակներ, արտասահմանյան վիսկի և կրոնական արձաններ, ընկերը նրանից պահանջում է, որ նա լրտեսի Դիեգոյին և իր բացահայտումները զեկուցի համապատասխան մարմիններին, քանի որ Դիեգոն, հավանաբար, «վտանգավոր հակահեղափոխական» է և այլախոհ մի տարր:

Այսպիսով, նրանց հանդիպումները շարունակվում են, և չնայած սկզբնական շրջանում միմիյանց նկատմամբ կասկածներին՝ երկուսի մեջ էլ զարգանում է մտերմություն, որը նրանց թույլ է տալիս հաղթահարել թյուրըմբռնումներն ու անհանդուրժողականությունը: Նրանք տաք ու կրքոտ բանավիճում են գրականության, երաժշտության, Կուբայի հեղափոխության, նույնասեռականության, Հավանայի մշակութային ժառանգության և այլ թեմաներով: 

Նրանք աստիճանաբար գիտակցում են, որ իրենց տարբերություններով հանդերձ, նրանք շատ առումներով նման են. երկուսն էլ սիրում են իրենց երկիրը, հոգ են տանում իրենց հասարակության մասին, հավատում են ազնվությանն ու բարեկամությանը և սեր են փնտրում: Նրանք նաև սովորում են, որ բոլոր այս արժեքները կարող են արտահայտվել տարբեր ձևերով, ինչը պիտք է գնահատել և հարգել:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՖԻԼՄԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>

KINO-START

KINOFILMS

___________________________________________________________

«Ելակ և Շոկոլադ» այս կայքում 

ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ

ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ

ՖԻԼՄԻ ՍԱՈՒՆԴԹՐԵՔԸ >>> ԱՅՍՏԵՂ