Showing posts with label Կուբա. Show all posts
Showing posts with label Կուբա. Show all posts

26.1.15

Կուբացի փոխսեռականները մի լուսանկարչուհու տեսախցիկում

Այստեղ ներկայացված լուսանկարները  նմուշներ են  «վերանշանակում» նախագծից, որի շրջանակներում լուսանկարչուհի Կլաուդիա Գոնզալեսը կողքկողքի դիմանկարել է մի խումբ կուբացի փոխսեռական տղամարդկանց և կանանց, երբ նրանք գտնվում էին իրենց գենդերային վերանշանակման անցումային փուլում:
 
Կլաուդիա Գոնզալեսը ծնվել է 1977 թ. Չիլիում, կրթվել է Եվրոպայում և աշխատում է նորաձևության ու մամուլի ոլորտներում որպես լուսանկարչուհի:
 
Այս նախագծի միտքը Գոնզալեսի մոտ հղացավ, երբ նա լսեց «Սենեսեքս»  կազմակերպության մասին: «Սենեսեքսը» Կուբայի սեռական կրթության ազգային կենտրոնն է (Centro Nacional de Educación Sexual կամ CENESEX), որը հիմնադրվել է 1989 թ. և ֆինանսավորվում է պետության կողմից:

Կազմակերպությունը սեռական փոքրամասնությունների և հատկապես փոխսեռականների հարցերով ցուցաբերում է բազմակողմանի աջակցություն և ապահովում է տարբեր կրթական ծրագրեր: «Սենեսեքսը» ղեկավարում է Մարիելա Կաստրոն, ով հանրապետության նախագահ Ռաուլ Կաստրոի դուստրն է:
 
Լուսանկարչուհին հույս ունի, որ իր այս նախագիծը կօգնի հանրությանը ավելի լավ իրազեկվելու և ըմբռնելու փոխսեռականների գոյության և նրանց հարցերի մասին:
 
Մարիելա Կաստրո՝ հանրապետության նախագահ
Ռաուլ Կաստրոյի դուստր և «Սենեսեքս» կազմա-
կերպության առաջնորդ:  Գերմանիայի Համբուրգ
քաղաքի գեյ շքերթում, 2010 թ.

Կուբայական օրորումներ
 
Կուբայի իշխանությունների քաղաքականությունը սեռական փոքրամասնությունների նկատմամբ բազմաթիվ անգամներ փոխվել է ժամանակի ընթացքում:

1959 թ. Կուբայի հեղափոխությանը հաջորդեց կարճատև մի ազատատենչ շրջան: Սակայն, երբ նոր վարչակարգը որդեգրեց կոմունիստական գաղափարախոսությունը և դարձավ ԽՍՀՄ-ի դաշնակից, սեռական փոքրամասնությունները դասակարգվեցին որպես «բուրժուական անկման արդյունքներ», «հասարակական պարազիտներ», «թափթփուկներ» և «ամերիկյան իմպերիալիզմի գործակալներ»:
 
1960-ականների կեսերին սկսվեցին համակարգված հալածանքներ  նույնասեռականների և այլ սեռական փոքրամասնությունների դեմ, որոնք եղան շատ դաժան: Սեռական փոքրամասնություններին պատկանող անձինք՝ մասնավորապես նուրբ շարժ ու ձև ունեցող տղամարդիկ, ձերբակալվում էին առանց իրենց դեմ նույնիսկ մեղադրանք առաջադրելու ու առանց դատվելու և  նետվում էին աշխատանքային ճամբարներ (տե՛ս Րեինալդո Արենասի կենսագրական ֆիլմը՝ «Նախքան գիշերամուտ»):
 
Մթնոլորդը ինչ-որ չափ փոխվեց 1980-ականների կեսերին: Կուբայի իշխանությունների դիրքորոշումը «սեռական շեղումների» նկատմամբ անփոփոխ մնալով հանդերձ՝ նրանց ռազմավարությունը փոխվեց՝ հետապնդում-հալածանքից դեպի «կրթություն», որը համարվում էր ավելի «արդյունավետ»: Նաև մեծ թվով նույնասեռականների թույլատրվեց լքել երկիրը և արտագաղթել:
 
Իրավիճակը սկսեց բարելավվել 1990-ականներին: Ֆիդել Կաստրոն և իր ղեկավարած Կոմունիստական կուսակցությունը քննարկեցին և վերանայեցին իրենց վերաբերմունքը նույնասեռականության հանդեպ: Կաստրոն նույնիսկ ինքնաքննադատեց և իր տիրապետության ներքո սեռական փոքրամասնությունների հետապնդումները անվանեց «մեծ անարդարություն»:
 
Հետևաբար, երկրում մեկնարկեցին հոմոֆոբիայի դեմ տարբեր արշավներ ! (տե՛ս «Ելակը և շոկոլադը», 1994 թ.) և վերջապես նույնասեռականությունը վերադասակարգվեց որպես «բնական մի սեռական կողմնորոշում»: Հետզհետե երկրի թե՛ ղեկավարությունը և թե՛ հանրությունը մասամբ իրազեկվեց նույնասեռականության, երկսեռականության, տրանսվեստիտիզմի ու փոխսեռականության առանձնահատկությունների մասին:
 
Ֆիդել Կաստրո՝ Կուբայի հեղափոխության առաջնորդ և երկրի նախագահ
(1976-2008): Նա 1970-ականներին ասել էր, որ ինքը հիացած է գյուղական
կյանքով, քանի որ «գյուղում, չկան նույնասեռականներ»: Ավելի ուշ՝ 1990-
ականներին, հրապարակայնորեն ինքնաքննադատեց իր հոմոֆոբիան:

Փոխսեռական անձանց նվաճումները

Պետք է նշել, որ «Սենեսեքսը» հիմնարար դեր է խաղացել այս բարելավման գործընթացում: Մարիելա Կաստրոյի անձնական մասնակցությունը էապես նպաստել է այդ ամենին:
 
Փոխսեռականների պարագայում, հատկապես, իրավական և հասարակական նվաճումները վերջին 20 տարիների ընթացքում ուշագրավ են եղել: Մինչդեռ նույնասեռականների և երկսեռականների պարագայում պիտի արձանագրել, որ նրանք դեռևս չեն օգտվում հավասար իրավունքներից և չեն վայելում հասարակական լայն  ընդունում: «Սենեսեքսը» նաև արդյունավետ գործունեություն է ծավալել ՄԻԱՎ-ի և ՁԻԱՀ-ի դեմ պայքարում:
 
Ինչ վերաբերում է փոխսեռական անձանց, 90-ականների կեսերից սկսած «Սենեսեքսը» կազմակերպել է համապարփակ և շարունակական մի քարոզարշավ՝ տեղեկացնելու և կրթելու հանրությանը, ինչպես նաև երկրի քաղաքական վերնախավին:

Այսպիսով, 2008 թ. Կուբայի խորհրդարանն ընդունեց մի օրենք, որով ճանաչեց փոխսեռական անձանց իրավունքները: Օրենքը նախագծել և առաջարկել էր «Սենեսեքսը»: Օրենքի ընդունումից ի վեր պետությունը լիովին ֆինանսավորում է փոխսեռական անձանց սեռական վերանշանակման վիրահատությունը և հորմոնալ թերապիան, ինչպես նաև նրանց է տրամադրում նոր իրավական նույնականացման փաստաթղթեր, որոնք համապատասխանում են նրանց սեռական ինքնությանը:

նմուշներ «վերանշանակում» նախագծից >>>

Աշենալ

Սիթիա

Դենեյ

Դայանա

Դենի

Լա Չիչի

Լա Ֆուեռթե

Լա Փաթռոնա

Լեդի Րոս

Նաթալի

Սահիրա

Վանեսա

Ուենդի

25.6.14

Ֆիլմ >>> Ելակ և Շոկոլադ, մաս 1-ին՝ 2-ից


ՖԻԼՄ
Ելակ և Շոկոլադ / Strawberry and Chocolate
/ Клубника и шоколад
 ՌԵԺԻՍՈՐՆԵՐ
Թոմաս Գութիերեզ Ալեա, Խուան Կարլոս Թաբիո
 ՍՑԵՆԱՐԻՍՏ
Սենել Փազ  

Հիմնված Ս. Փազի «Գայլը, անտառը և նոր մարդը» պատմվածքի վրա
 ԵՐԱԺՇՏՈՒԹՅՈՒՆ
Խոզե Մարիա Վիթիեր 
 ԳԼԽ.ԴԵՐԱՍԱՆՆԵՐ
Խորխե Փերուգորիա , Վլադիմիր Կրուզ
 ՏԱՐԵԹԻՎ
1994
 ԵՐԿԻՐ 
Կուբա, Մեքսիկա
 ՏԵՎՈՂՈՒԹՅՈՒՆ
108

Այս ֆիլմը պատմում է երկու տարբեր և շատ առումներով հակադիր կերպարների հանդիպման մասին Հավանայում (Կուբա), 1979 թ.: Մի օր, սրճարանում տեղ չլինելու պատճառով, Դիեգոն (Խորխե Փերուգորիա) և Դավիդը (Վլադիմիր Կրուզ) նստում են նույն սեղանին: Դավիդը համոզված է, որ Դիեգոն նույնասեռական է, քանի որ նա ուտում է ելակե պաղպաղակ, թեև դա հազվադեպ օրերից է, երբ Հավանայում առկա է շոկոլադե պաղպաղակ, և, բնականաբար, բոլոր սովորական մարդիկ էլ ուտում են այն:

Ելակը 

Եվ նա չի սխալվում: Դիեգոն գեյ է, արվեստագետ և չափազանց դժգոհ է երկրում քաղաքական և գեղարվեստական ազատությունների բացակայությունից: Նա շատ կիրթ, նրբաճաշակ, կոլորիտային և աշխույժ մարդ է, ունի ուժեղ արտահայտված նուրբ վարքուբարք, և իր բնակարանը զարդարել է փոքր-ինչ Փարաջանովի տուն-թանգարանի ոճով, իրար կողքի շարելով՝ գույնզգույն կոլաժներ, զարմանալի իրեր, քանդակներ, լուսանկարներ և գեղանկարներ:

Շոկոլադը

Դավիդը տարասեռական տղա է՝ համալսարանի ուսանող, նեղմիտ ու ազգայնական,  կոմունիստական կուսակցության ռազմիկ: Նա գյուղական համեստ ընտանիքի զավակ է և հիմա ապրում է հանրակացարանի խիստ պայմաններում: Նրա անձնական կյանքը վերջերս փլուզվել է. նրա նշանածը նրան լքել է՝ ամուսնանալու մեկ այլ տղամարդու հետ, ով կարող է պարգևել ապահով ու հարմարավետ կյանք: Դավիդը ազնիվ մարդ է և որոշ առումներով՝ միամիտ ու լի նախապաշարումներով ու կարծրատիպային գաղափարական մտածողությամբ: Նա կարծում է, որ նույնասեռականությունը հիվանդության տեսակ է, որի առաջացման պատճառը վահանագեղձում է գտնվում:

ՖԻԼՄԻ ԹՐԵՅԼԵՐԸ  >>>




Ելակը և Շոկոլադը

Սրճարանից հետո, նրանք գնում են Դիեգոյի բնակարան, բայց կարճ ժամանակ անց, երբ Դավիդը զգում է, որ Դիեգոն սեռական մտադրություններ ունի, լքում է Դիեգոյին: Նա չի ցանկանում կրկին հանդիպել Դիեգոյին։ Բայց, երբ իր համակուսակից ընկերոջը պատմում է, որ հանդիպել է «տարօրինակ» մի տղայի, ով ունի արգելված իրեր, ինչպես օրինակ ամերիկյան ձայնասկավառակներ, արտասահմանյան վիսկի և կրոնական արձաններ, ընկերը նրանից պահանջում է, որ նա լրտեսի Դիեգոյին և իր բացահայտումները զեկուցի համապատասխան մարմիններին, քանի որ Դիեգոն, հավանաբար, «վտանգավոր հակահեղափոխական» է և այլախոհ մի տարր:

Այսպիսով, նրանց հանդիպումները շարունակվում են, և չնայած սկզբնական շրջանում միմիյանց նկատմամբ կասկածներին՝ երկուսի մեջ էլ զարգանում է մտերմություն, որը նրանց թույլ է տալիս հաղթահարել թյուրըմբռնումներն ու անհանդուրժողականությունը: Նրանք տաք ու կրքոտ բանավիճում են գրականության, երաժշտության, Կուբայի հեղափոխության, նույնասեռականության, Հավանայի մշակութային ժառանգության և այլ թեմաներով: 

Նրանք աստիճանաբար գիտակցում են, որ իրենց տարբերություններով հանդերձ, նրանք շատ առումներով նման են. երկուսն էլ սիրում են իրենց երկիրը, հոգ են տանում իրենց հասարակության մասին, հավատում են ազնվությանն ու բարեկամությանը և սեր են փնտրում: Նրանք նաև սովորում են, որ բոլոր այս արժեքները կարող են արտահայտվել տարբեր ձևերով, ինչը պիտք է գնահատել և հարգել:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ  >>>  ԱՅՍՏԵՂ

ՖԻԼՄԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ  >>>
___________________________________________________________
«Ելակ և Շոկոլադ» այս կայքում 

ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ
ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ
ՖԻԼՄԻ ՍԱՈՒՆԴԹՐԵՔԸ >>> ԱՅՍՏԵՂ

16.6.14

Ֆիլմ >>> Նախքան գիշերամուտ, մաս 1-ին՝ 2-ից


 Ֆիլմ
 Նախքան գիշերամուտ / Before Night Falls
  / Пока не наступит ночь
 ՌԵԺԻՍՈՐ
 Ջուլիան Շնաբել  
 ՍՑԵՆԱՐԻՍՏՆԵՐ
 Ջ. Շնաբել, Կ. Օկիֆ, Լ. Գոմեզ Կառիյես
 Ռեյնալդո Առենասի հուշերի հիման վրա
 ԵՐԱԺՇՏՈՒԹՅՈՒՆ
 Կարտեր Բուրւել
 ԳԼԽ. ԴԵՐԱՍԱՆՆԵՐ 
 Խավիեր Բարդեմ, Օլիվիե Մարտինեզ,
 Անդրեա դի Ստեֆանո
 ՏԱՐԵԹԻՎ
 2000
 ԵՐԿԻՐ
 ԱՄՆ
 ՏԵՎՈՂՈՒԹՅՈՒՆ
 133

Ծառերը ունեն գաղտնի մի կյանք, որով բացահայտում են միայն նրանց, ովքեր ցանկանում են մագլցել իրենց վրա:


Այս ֆիլմը պատմում է նշանավոր կուբացի բանաստեղծ և վիպասան Ռեյնալդո Առենասի (1943-1990) կյանքը, նրա՝ մահից երեք տարի անց  հրատարակված հուշերի  և  մի շարք բանաստեղծությունների ու վեպերի հիման վրա:

Ֆիլմի ոճը համահունչ է Առենասի բանաստեղծական ոգուն: Հետևաբար, հակառակ կենսագրական ճշգրտության որոնմանը և իրադարձությունների ստույգ վերակառուցմանը, ռեժիսորը նախընտրել է տեսողական պոեզիայի լեզվով ցուցադրել Առենասի կյանքը, նրա ներաշխարհը և նրա անդադար ձգտումը ազատության՝ թե՛ գեղարվեստական, թե՛ սեռական և թե՛ քաղաքական:

Ֆիլմը պարունակում է մի քանի ասմունքներ Առենասի թե՛ բանաստեղծություններից և թե՛ արձակ գործերից և համակցում է գեղանկարչության ոճով պատկերած տեսարանները, ինչպես նաև խնամքով ընտրած երաժշտությունը: Երբեմն դժվար և թեկուզ անհնար է տարանջատել, թե արդյոք տեսարանը ցույց է տալիս իսկապե՞ս տեղի ունեցած մի դեպք, թե Առենասի համար ընդամենը այդ դեպքի հրահրած ոգեշնչումներն արտահայտող մի տեսարան:

Վաղ կյանք

Ֆիլմը ցույց է տալիս Առենասի մանկությունը թշվառ մի գյուղում, որտեղ նրան մեծացնում են իր մայրը և նրա գերդաստանը: Նա խաղում է ցեխի հետ և փորագրում իր առաջին բանաստեղծությունները ծառերի վրա: Նա ընդմիշտ տպավորվում է տեղատարափ ջրհեղեղներով, որոնք մեծ թափով ծածկում են ողջ տարածքը և ստեղծում հուզիչ պատկերներ:

Իր ուշ պատանեկան տարիներին Առենասը (Խավիեր Բարդեմ) հարում է Կաստրոյի ապստամբությանը և ի վերջո միանում է պարտիզաններին: 1959 թ. ապստամբությունը տապալում է ԱՄՆ-ի կողմից սատարված իշխանություններին: 1960-ականներին մայրաքաղաք Հավանա տեղափոխվելուց հետո Առենասը շարունակում է իր բարձրագույն ուսումը, ծավալում է իր գրական գործունեությունը և հրատարակում է իր առաջին գիրքը՝ իր միակ գիրքը, որը երբևէ հրատարակվել է Կուբայում: Նա նաև սկսում է հարցադրել իր սեռականությունը և ծանոթանում է Փեփեի հետ (Անդրեա դի Ստեֆանո), ով հարուստ ընտանիքից մի երկսեռական տղա է : Նա Առենասին ներկայացնում է Հավանայի ծաղկուն գեյ կյանքը: 

ՖԻԼՄԻ ԹՐԵՅԼԵՐԸ >>>



Հեղափոխության փոփոխությունը

Ֆիլմը ցույց է տալիս կուբայական հեղափոխության զարգացումը՝ վաղ ազատատենչ ժամանակաշրջանից դեպի բռնապետական փուլ, և թե ինչպես է այս փոփոխությունն ազդում Առենասի կյանքին ու աշխատանքին:

Վաղ շրջանում հեղափոխական հոգին և ընդհանուր ազատությունների վերականգնումը Կուբայում իրենց հետ  բերում են սեռական ազատություններ: Այստեղ ֆիլմը ցուցադրում է հեղափոխության հաղթանակին վերաբերող վավերագրական կադրեր, որոնց ֆոնի վրա արտասանվում է Առենասի «Շքերթը սկսվում է» կարճ պատմվածքից հատվածներ, որտեղ նա արտահայտում է իր հուզմունքը և համակրանքը հեղափոխության նկատմամբ:

Մի քանի տարի անց իրավիճակը հիմնովին փոխվում է, երբ Կաստրիստ իշխանությունները, Խորհրդային իշխանության ազդեցության ներքո և իրենց դիրքերը պահպանելու համար որդեգրում են կոմունիստական գաղափարախոսություն և դիմում են քաղաքական հալածանքների:

Փոխվում է  քաղաքականությունը նաև նույնասեռականության նկատմամբ: Նույնասեռականությունը դասակարգվում է որպես «հասարակական շեղում» և «բուրժուական անկման դրսևորում»: Իշխանությունները ձերբակալում և դատապարտում են արվեստագետներին և ստեղծում են համակենտրոնացման ճամբարներ նույնասեռականների և քաղաքական այլախոհների համար: Սրանք բոլորը կտրականապես օտարում են Առենասին հեղափոխությունից:

ՀՈԴՎԱԾԻ ՇԱՐՈՒՆԱԿՈՒԹՅՈՒՆԸ >>> ԱՅՍՏԵՂ

ՖԻԼՄԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ >>>
(6 րոպեով կրճատված)

___________________________________________________________
«Նախքան գիշերամուտը» այս կայքում

ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ
ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ
ՖԻԼՄԻ ՍԱՈՒՆԴԹՐԵՔԸ >>> ԱՅՍՏԵՂ
ՖԱՆԱՏԻ ՎԻԴԵՈ ՄՈՆՏԱԺ 1 >>> ԱՅՍՏԵՂ
ՖԱՆԱՏԻ ՎԻԴԵՈ ՄՈՆՏԱԺ 2 >>> ԱՅՍՏԵՂ
ՕՊԵՐԱ ՆԵՐԿԱՅԱՑՈՒՄԸ >>> ԱՅՍՏԵՂ