Ֆիլմ
|
Սարդ-կնոջ համբոյրը / The Kiss of the Spider Woman
|
/ Поцелуй женщины-паука
|
|
ՌԵԺԻՍՈՐ
|
Հեկտոր Բաբենկո
|
ՍՑԵՆԱՐԻՍՏ
|
Լեոնարդ Շրեյդեր
|
հիմնված Մանուել Փուիգի համանուն վեպի վրա
|
|
ԵՐԱԺՇՏՈՒԹՅՈՒՆ
|
Նանդո Կորդեյրո և Ջոն Նեչլինգ
|
ԳԼԽ. ԴԵՐԱՍԱՆՆԵՐ
|
Ուիլյամ Հարթ, Ռաուլ Խուլյա, Սոնյա Բրագա
|
ՏԱՐԵԹԻՎ
|
1985
|
ԵՐԿԻՐ
|
Բրազիլիա և ԱՄՆ
|
ՏԵՎՈՂՈՒԹՅՈՒՆ
|
121
|
Երջանիկ զգալու մեջ ամենահաճելին այն է, որ մեզ թվում է, թե այլևս երբեք դժբախտ չենք լինելու:
- Մանուել Փուիգ
Համանուն հաջողակ գրքի և պիեսի հիման վրա նկարված այս ֆիլմը պատմում է երկու տարբեր և շատ առումներով՝ հակադիր տղամարդկանց մասին, ովքեր կիսում են մի բանտախուց, անանուն լատինաամերիկյան մի երկրում, որտեղ իշխում է զինվորական կառավարություն:
Լուիս Մոլինան (Ուիլյամ Հարթ) նույնաասեռական դեկորատորէ, ով գտնվում է բանտում՝ դեռահաս տղայի հետ սեքսով զբաղվելու մեղադրանքով, իսկ Վալենթին Արեգուին (Ռաուլ Խուլյա) լրագրող է, ով ազատազրկվել է իր քաղաքական գործունեության պատճառով, մի հեղափոխական խմբի շրջանակներում:
Երկու հակասական կերպարներ
Պատկերված են երկու շատ կարծրատիպային կերպարներ՝ մի «փափուկ» տղամարդ և մի «իսկական» տղամարդ: Մոլինան մեղմ, զգացմունքային, թուլամորթ և որոշ առումներով՝ ծանծաղ նույնասեռական-տրանսվեստիտ է: Նա նախընտրում է մտածել և գործել կանացիորեն և մշտապես փորձում է գտնել իր կյանքի «իսկական տղամարդուն», ում կարող է լիովին սիրել և տրվել՝ որպես իր տիրոջ: Մինչդեռ Վալենթինը կոշտ, կոպիտ, մորուքավոր և փոքր-ինչ ձանձրալի ու խոժոռ մարդ է:
Մոլինան հոգ է տանում մարդկային հարաբերությունների և զգացական կապերի համար և անտարբեր է հասարակական և քաղաքական հարցերի նկատմամբ: Բանտախցում գրեթե ոչինչ չունենալով՝ նա կարողանում է իրեն վերածել մի փողփողուն դրագ-քուինի և կազմակերպել ճոխ ֆիեստաներ: Կյանքի ծանր իրողություններից փախչելու համար նա ապաստան է գտնում երևակայական մի աշխարհում, որտեղ կարող է արտահայտել իր հմայքը կին կերպարների նկատմամբ և իրեն նույնականացնել նրանց հետ:
Վալենթինը, ի տարբերություն Մոլինայի, լիովին կլանված է իր քաղաքական պայքարով և մարքսիստական գաղափարախոսությամբ: Նրա համար սերն ու կյանքի հաճույքները, ինչպիսիք են, օրինակ, լավ ուտեստները, երկրորդական են: Նա նույնիսկ դեռ չի խոստովանել իր սերը վաղեմի նշանածին:
ՖԻԼՄԻ ԹՐԵՅԼԵՐԸ >>>
Բախում և հաշտեցում
Երկու բանտակիցները, բնականաբար, բախվում են: Մոլինայի համար Վալենթինը տխուր մի մարդ է, ով ունի շատ նեղ և սահմանափակ հայացք կյանքին: Վալենթինի համար Մոլինան հասարակական պարազիտ է, տգետ ու վախկոտ մի մարդ, ով հաճախ մոռանում է իր «տղամարդկությունը»: Նա արհամարհում է Մոլինային:
Սակայն երազողի և ակտիվիստի միջև առկա լարվածությամբ հանդերձ՝ ի վերջո երկուսի միջև զարգանում է փոխադարձ հարգանք ու բարեկամություն: Այս անհավանական մերձեցման պատճառներից մեկն այն է, որ գաղտնի ծառայությունները Մոլինայից խնդրել են լրտեսել Վալենթինին: Այնպես որ, Մոլինան փորձում է ամեն գնով մտերմանալ Վալենթինի հետ և նվաճել նրա վստահությունը: Մյուս պատճառն այն է, որ նա հրապուրվել է Վալենթինով: Նա անկեղծ է, երբ Վալենտինին առաջարկում է իր սիրտը՝ քաղցրավենիքի մի սրտաձև տուփի տեսքով:
Փախուստ դեպի երևակայական աշխարհ
Սա ֆիլմ է՝ ֆիլմի մեջ: Մոլինան հաճախ է իր ժամանակն անցկացնում սիրած ֆիլմերի հիշողությունները պատմելով: Այդ ֆիլմերից մեկը պատերազմական սիրավեպ է, որում ֆրանսիացի մի կաբարեի երգչուհի (Սոնյա Բրագա) սիրահարվում է գերմանացի մի գեղեցիկ սպայի: Ապաքաղաքական Մոլինան երբեք չի հասկացել, որ դա նացիստական քարոզչական ֆիլմ է: Ի դեպ նրա ընդհանուր գիտելիքներն այնքան սահմանափակ են, որ նա հրեաներին շփոթում է թուրքերի հետ:
Մոլինայի պատմած երկրորդ ֆիլմը, կարծես թե, իրականում ֆիլմ չէ և զուտ իր երևակայության արդյունքն է: Այս երկրորդ «ֆիլմը» արևադարձային սիրային հեքիաթ է, որի գլխավոր հերոսներն են Սարդ-կինը (Սոնյա Բրագա) և Վալենթինը:
Մոլինայի պատմությունները հյուսվում են այնպես, որ նրան թույլ են տալիս ստեղծել երևակայական աշխարհ՝ Վալենթինին զվարճեցնելու և նրա ուշադրությունը իր ազատազրկման ծանր իրողությունից, այդ թվում՝ հարցաքննության և խոշտանգման փորձառություններից շեղելու համար: Աստիճանաբար Վալենթինը սկսում է գնահատել Մոլինայի զվարթ ու երջանիկ ապրելու ձգտումը, նրա հարուստ երևակայությունը և բարությունը: Այս փոխադարձ հարգանքը, իրար վրա ազդելը ու իրարից սովորելը, սակայն, տանում են շատ ավելի հեռու և հանգեցնում անսպասելի զարգացումների:
ՖԻԼՄԻ ՌՈՒՍԵՐԵՆ ՕՆԼԱՅՆ ՏԱՐԲԵՐԱԿԸ >>>
_____________________________________________________
«Սարդ-կնոջ համբոյրը» ֆիլմը այս կայքում
ՖԻԼՄԻ ԹՐԵՅԼԵՐԸ + ՀՈԴՎԱԾԻ ՄԱՍ 1 >>> ԱՅՍՏԵՂ
ԿԱԴՐԵՐ ՖԻԼՄԻՑ + ՀՈԴՎԱԾԻ ՄԱՍ 2 >>> ԱՅՍՏԵՂ
No comments:
Post a Comment